哈佛台語101（四版）（一書＋１ＭＰ３）

Chit本冊是我 2001~2004 期間 tī 哈佛大學開台語課 ê 時特別為 hia ê 學生寫 ê。沿á上沿á寫，算是實驗教學寫出來 ê。學生其實 lóng 是作者之一，in一面學一面出意見。因為課本中有一個男主角 Arnlod 是 tī 美國大漢 ê 第二代台美人，女主角 A-tin 是台灣來 ê 台灣cha-bó͘ gín-á,每課有每課 ê 主題，mā 有劇情 ê 進展，所以學生 lóng真期待我後一課會寫啥物？Arnold kap A-tin koh 來會按怎？這 mā 是一款吸引學生學習動機 ê 方法。In mā會出意見，講 koh 來 ài 按怎會 khah 心適，按怎 koh khah 好。In ê 意見我 lóng 有接受，ē-sái講chit本課本實際上是我 kap 學生 ê 集體創作。

Tī Harvard 上課 ê 時，我是採用白話字，á就是傳統教會羅馬字（教羅）。2005年6月，教羅已經 kap TLPA （台灣語言拼音方案）整合做「台灣羅馬拼音」（簡稱「台羅」）。台羅kap 教羅 ê 差別真少（其實教羅 kap TLPA 本底tio̍h 差別真少），主要是介音 ùi 原來 khah 倚音值改 hō͘ khah 倚音素。塞擦音改用國際音標(IPA) [ts], [tsh]。Án-ne「台羅」就算是一套真系統 tek （systematic），真有一致性 (consistent ) ê 音素文字，是音標，mā 是文字，好教好學 koh 正確。

除了採用「台羅」，tī 調號 ê 標記位置我mā 有 kā 改 hō͘ khah 合語言學原理，koh 有一致性。調符到底應該 khǹg tī tó 一個母音？應該是 khǹg tī 響度上大 ê 母音( most sonorous vowel )頂kôan。Án-ne來標記 tio̍h 真一致，mā 真合理。調（tones）是每一個音節上重音 ê 物件，應該 khǹg tī 響度上大 ê 母音頂高。台語母音 ê 響度根據許惠娟(2003)：a > o͘ > e > o > i > u若 lóng 照響度來標記，to̍h bē 像以前 "ui" kap "iu" 有時標 tī "u"，有時標 tī "i" ê 情形，比如 ūi,iū。介音 lóng 改做音素標記 mā 同時解決調號標記 ê困擾。以前 "oe","oa" ê "o" 到底算是 "o͘", "o" á是 "u" ? 現在恢復用音素 /u/ 標記，調號當然 lóng tī 響度khah 大 ê 另外 hit ê 母音，比如 "u ē"，"u ā"。

用chit-ê合語言學原理，koh有一致性 ê 音素文字來教台語，我相信效果一定會比當時我 tī Harvard 上課 ê 效果 koh khah 好。當時用白話字教chit本課本 ，lóng bē-hiáu台語 ê 哈佛學生上了tio̍h會曉編短劇來演，會曉參加台語演講比賽。若是用「台羅」音素文字來學，我看附錄中〈哈佛台語一冬評詁〉內底 ê 錯誤一定會減少真 chē,一冬落來, 若無 sià-sià 叫，siōng少「台語 mā 會通」！