臺江臺語文學季刊第33期：當季專輯《為愛導讀》（109/03）

編輯手記

歡喜迎新

編輯部

時間過了真緊，已經閣進入新的一年矣，經歷風湧重重的2019年，由國際注目牽動經濟政治戰略的美中貿易戰爭，到香港反送中抗爭、澳洲共諜投誠事件、臺灣總統大選等等，一波接一波的衝擊，特別是佇今年1月11日，長期面對中國文攻武嚇，無所不至的干預之下，臺灣多數的人民共同以拍破歷來民選總統得票紀錄的超懸票聲，支持守護臺灣主權佮民主自由的蔡英文總統懸票連任，向全世界展現咱的尊嚴佮自信，宣告堅定的意志佮決心。佇遮，除了佮逐家鬥陣分享身為臺灣人的勇敢佮光榮之外，嘛歡喜佇新的一年迎接新的局勢、新的契機，對國家未來的展望，對本土文化的推捒（sak），包括濟濟文友所關心的語言政策，相信會當樂觀期待順利接紲（suà，續）發展，持續落實佮深化。

民主自由平等從來就毋是憑空出現的，了解臺灣歷史的人應該攏有深刻的感受，咱恭喜蔡英文總統，也感謝伊為咱承擔，2020新年新氣象，祝逐家平安順序，萬事如意。

文化獎‧文學獎

這期的公共議題方面，報導臺南年前舉行的兩个重要文化活動，一个是2019第八屆臺南文化獎，得獎人國立成功大學建築學系名譽教授傅朝卿，是文化資產保存的先行者，佇早期臺灣文資保存未受重視的時，傅教授毋但致力開創佮推動，而且長年參與臺南文化事務，積極奉獻專長，無論發揚、實踐、傳授、著作等各方面攏有高度的成就，對臺南城市發展影響深遠，咱祝賀伊，並紹介伊傑出的事蹟。

閣一个是2019第九屆臺南文學獎，臺南市政府長期鼓勵文學創作、推廣寫作風氣，佮栽培人才建構在地的文學特色而舉辦的「臺南文學獎」，今年已經進入第九冬矣，參賽的作品總件數高達519件，是近年來上濟的一擺，會當講是文學豐收的年冬。其中，關於臺語文學的「臺語現代詩」佮「臺語短篇小說」的獎項，已經漸漸內化成做城市的文學特色之一，咱進前期刊登臺語現代詩首獎作品，詩人作家柯柏榮創作的《記持開始食餌--ah──詩寫外公陳 tsuë》，這期接紲刊登臺語短篇小說首獎，詩人作家王永成創作的《地獄谷》，邀請逐家做伙來欣賞、觀摩。

特稿佮專輯

這期「王育德紀念專題系列」除了有詩人作家周華斌的《一番星ê傳說──送組成「台灣人元日本兵士補償問題思考會」ê王育德先生》，嘛邀約王育德博士的查某囝，目前擔任「台灣獨立建國聯盟」日本本部委員長的王明理女士參與，書寫《正月の準備‧二つの文化》，並委託成功大學陳麗君教授翻譯以日臺雙語對照呈現，予逐家品味無仝的國風、語言之間的趣妙。另外，臺文界的前輩洪惟仁教授所寫的《黃勁連先生个台語貢獻》，毋但寫出佮伊仝年的老朋友「勁連仙」──仝款是臺文界的先行者黃勁連老師，對臺語文濟濟的貢獻，包括各類的文學創作、民間文學、漢文研究……等多方面的成就，行句之間嘛引出近代臺語文學發展重要的進程佮觀念，會當予關心的朋友佮研究者做參考。

當季專輯「為愛導讀」，各作者所紹介導讀的並無侷限佇臺文著作，除了臺文前輩沙卡布拉揚的台語長篇小說《霧城》以外，分別有《逝去的武林》、《約翰‧克利斯朵夫》、《文藝春秋》，以及徛佇殘障者的角度，感念鄭豐喜的作品所帶來的鼓舞佮啟示的《有愛無礙》。

無仝的視角，會當看著無仝的風景，希望也帶予逐家無仝的體驗。

001 運河暮色

005 編輯手記──歡喜迎新／編輯部

008 城市的情韻 / 府城的古婚禮／曾謙喜

010 淡水河右岸／郭文玄

012 馬胎古道作陣行／鄭如絜

014 《海島歌聲》出海口／楊凱文

017 文資保存的先行者──2019第八屆臺南文化獎傅朝卿／採訪報導／鄭曼儀

024 文學豐收的年冬！──2019第九屆臺南文學獎／採訪報導／葉書庭

030 一番星ê傳說──送組成「台灣人元日本兵士補償問題思考會」ê王育德先生／周華斌

034 正月の準備．二つの文化／原作／王明理 臺譯／陳麗君

054 糊紙藝術──一本無形的傳統藝術文化資產／程鉄翼

059 為愛導讀 / 消失的掌風拳影──我讀「逝去的武林」／王希成

060 羅曼羅蘭的『約翰‧克利斯朵夫』／周梅春

064 Ná親像轉去佇雺霧ê時代，向望將來──紹介沙卡布拉揚ê台語長篇小說《霧城》／呂美親

070 有愛無礙／賴朝和

076 《文藝春秋》──戰後臺灣心靈 / 文藝史／林榮淑

089 我上佮意的戲齣 / 家將面譜／楊福生

090 戲齣人生／呂昭燕

092 相放伴／韓滿

094 便當情懷／謝慈愛

097 迷人的布袋戲／呂仁鈞

102 我上佮意的戲齣／吳正任

現代詩

112 心血來潮／黃勁連

114 大里杙踏查──記訪林爽文古厝／杜信龍

117 《是非有芳臭》詩兩首：帽仔 kap 頭殼之戀、半ló-läu／李勤岸

120 按怎回妳的批／柯柏榮

122 你的目睭有一面鏡／曾美滿

125 後山山茄石／林益彰

126 總算，咧欲離開你／古能豪

128 一跤的時──台灣鳥仔系列：白翎鷥／黃徙

130 臭耳人／蘇善

132 思念用啥物來糊／高月員

133 雲／張威龍

134 我想欲做一个夢／沙山懷若

135 思念起癢／薛榮永

136 《海島歌聲》台南囡仔／詞曲：糖果先生

散文•小說

138 紅色的火光 白色的鐵網──許強／陳正雄

148 文化頭／許嘉勇

150 「雲嶺之丘」美景踏查／楊振裕

163 寒裡百合送清芳／吳嘉芬

167 同窗會／林美麗

169 阿樹仔／Alana Hana

172 約會／田美瑜

177 地獄谷／王永成

臺譯文章

199 林宗義ê故事（三）──化悲情為大愛ê人生路／◎華語原著：曹永洋 台語翻譯：林俊育

評•論

216 黃勁連先生个台語貢獻／洪惟仁

235 台江大海翁詩草蓊蓊──江山滿滿文本林（下）／胡民祥

講到太平洋

246 狗兄弟學台語佮畫圖（二）／康原

《台灣俚語小學堂》

249 燒瓷的食缺，織蓆的睏椅／阿昆

250 未曾學行先學飛，未曾掖種想挽瓜／阿昆

251 專題徵文

252 徵稿啟事

254 版權頁

 
 
｜書序｜

《文藝春秋》──戰後臺灣心靈 / 文藝史（節錄）

◎林榮淑

《文藝春秋》是一个台灣囡仔寫予土地長長的批，收件人是戇神閣拍拚問過「我是啥物人？」的島民。這本冊風神得著：2017年金鼎獎、吳濁流文學獎、台灣文學獎長篇小說創作金典獎、佮2018台北國際書展大獎等等特殊的榮耀；作者黃崇凱本人嘛入選2017年台灣文學年鑑的「焦點人物」。

․踏話頭

一本鍍金框銀的好冊。文壇有頭有面的專家學者、作家……評論，百花齊開。舉例：文化評論家詹偉雄佇冊後〈歷史、虛構與疼痛〉的結尾，按呢寫：「伊是九○年代臺灣文青的一部心靈史，嘛是一本新銳小說。」名作家駱以軍佇這本冊上後壁寫一篇〈哭笑不得的臺灣心靈史〉。

一个捌字無濟的小卒仔，嘛佮人鬥鬧熱，想欲參一跤，對《文藝春秋》厚話一下。除了有一段小姻緣，亦是抱著法國文學批評家、文學家、社會學家、哲學家佮符號學家羅蘭‧巴特一句名言「作品寫完，作者已經過身矣。」若是讀歪去，抑是講毋著話，無啥物通煩惱。因為《文藝春秋》寫完出版，作家已經過身，根本袂來揣我算數。閣再講，我的閱讀心得寫完，我嘛過身矣。一个人干焦會當死一擺，若準有讀者無滿意，根本揣無人通算數。嘿嘿嘿！

佮意藝文活動，晚頓款好勢若有閒，定定參加臺北地區大細藝文活動。紀州庵文學森林留落誠濟的跤印。「編輯之夜」算是誠趣味的活動之一。逐擺攏聘請無仝款出版社的總編輯、作家，佮一、兩个專業人士做伙坐一排，每一个人用的專業角度，詳細描繪對有身、到分、落塗，一本燒燙燙的冊上市的過程。遮對讀者來講，是誠新鮮嘛誠趣味的故事。

逐本冊攏有屬於伊家己的一本性命史。

有一擺，「編輯之夜」邀請衛城出版社總編輯莊瑞琳老師講《文藝春秋》。作家黃崇凱臨時煞有代誌袂當來，冊嘛猶佇印刷工廠咧印，袂赴來現場佮讀者會面，這款情況是佇「編輯之夜」頭一擺拄著。這兩个小缺點，一點仔就無關係，莊總編輯條理分明紹介編輯按怎佮作者參詳、協議、撨出共識，共《文藝春秋》生出來。學識飽填的伊，一个人自然自在應付台頂參台跤的疑難雜症，頭尾攏無冷場。煞鼓進前，是上尾溜的Q&A時間。我搶著問問題的機會，會當得著一本作家簽名《文藝春秋》的冊。

過無幾工，冊出版矣。誠準時，足緊就收著簽名冊（正爿的相）。歡喜甲無暝無日一直看。發現袂少華語透濫台腔的文句，夭壽趣味，對作者的文采講袂出喙的欣羨閣佩服，精彩的所在來來去去，重複看幾若遍。開始四界揣機會，食好鬥相報。

2019年，無張持看著國家人權博物館景美紀念園區舉辦人權讀書會「當台灣文學遇見白色恐怖系列講座II」kh ng-páng，第3場：8月24日（六）14:00~16:00「聶華苓的三輩子」｜黃崇凱主講的消息。排除萬難，親身去會場看作家風采、聽本人親喙講時間空間背景大甲敢若文學史冊《文藝春秋》，其中的第二篇〈三輩子〉。

紲落來，無名小輩大膽為愛導讀，「野人獻曝」矣。