逗陣來唱囡仔歌06：幼幼篇

佇生活中學習母語

囡仔成長的過程，攏是佇長輩的身軀邊慢慢仔大漢，聽大人講的話來學習語言，你講台語伊學台語，咱若講華語伊著學華語，所以阿母講的話咱稱呼「母語」。教育哲學家杜威講：「教育就是生。」所以咱應該對（ui3）生活中來教in 學習各種生活的能力，阿母講的話當然是囡仔上早學的語言。
《逗陣來唱囡仔歌六、七》兩本冊，是特別為幼稚園的囡仔寫的歌，每首歌攏有真媠（suí）的插圖，由兩位音樂教師賴如茵、張怡嬅譜的曲，旋律攏真輕鬆、活潑，歌詞的內容表達真鬥搭，予囡仔真緊就會使進入夢想的世界。
細漢囡仔透過目睭看大人的世界，咧𨑨迌的時陣攏是學大人做的代誌，所以阮定講「囡仔為著𨑨迌來出世」，咱才會講「身教重於言教」，綴（tuè）著大人咧學習成長，大人所有的行為攏會影響囡仔人格的成長。
這兩本囡仔歌內容有：大自然的描寫，親像日頭、月娘、山、風、花園等等，嘛有對家己身軀的認捌、民間的信仰拜拜、家庭的阿公、阿媽的生活、平常看會著的電視佮電腦、節日愛做的紅龜粿、中秋的月餅等，內容千變萬化，有過去台灣人的經驗，嘛有現代人的生活。
學習語言毋是干焦學口語爾爾（niā-niā），透過學習語言的時陣，來教囡仔熟似家己族群特殊的生活，也愛保持台灣人好的價值觀念，佇細漢的時陣養成好的習慣，大漢才有正確的人生觀。親像咱定定咧講：「細漢偷挽匏，大漢偷牽牛。」這句話保留農業社會「匏」佮「牛」的生活影像，作先生愛去傳承這句語詞，嘛愛說明時代的背景，就是學語言兼捌代誌的道理。
出版這兩本囡仔歌，內容表達出多元的語言素材，充滿著趣味性，每首歌只有三句，親像〈耳空〉：「兩個耳空　烏櫳櫳／一空聽著　基隆／一空聽著　假人」，這首歌開始愛予囡仔知影，頭部的器官：耳空、鼻仔、喙、目睭，閣在教in 這个器官的功能，才閣教in 字音的分別：親像「雞籠、基隆、假人、嫁人」的分別，「孔」佮「空」的無相仝。
阮主張囡仔的教學愛多元，而且先生愛用有創意的教學方法，啟示囡仔去自由思考佮創造，透過家己的夢想世界，去追求未來的理想，阮寫過一首〈好耍的代誌〉：

教一陣囡仔 拚龜拚鱉
教一陣囡仔 空思夢想
教一陣囡仔 想東創西
教到 有巧氣佮有創意
追求心內的 媠氣
教伊詩中的 畫意
予聽輕鬆的 旋律
閣有趣味的 故事
教in 古早佮現代好耍的代誌