台灣俗語講座

◎台灣俗語詳解，詳列常用字詞正確讀音與應用方式。
◎每一講主題延伸華台語對照、生動台語歇後語故事，加強學習印象。
◎結合台灣處境、時事、國際關係做為俗語使用範例，落實語言的生活化學習。

俗語，是世俗的智慧語言，它是人生的經驗哲學，也是語言的藝術，利用幾個字就能表達世間酸甜苦辣的現象。懂得利用俗語，一句就能抵萬言，也可增添說話的風情與內涵。

台灣俗語也是台灣人民經歷許多歷史與變遷累積出來的語言精華，不但蘊含台灣本地的風俗人情，同時也展現台灣人的處世智慧，活在這塊土地的人，都可以去親近理解，以了解先人生活與奮鬥的足跡。

本書作者巫義淵為台灣語文專家，有感於台灣語言逐漸為大家所遺忘，所以戮力完成本書，本書共分十八講，每講再分解讀、正音、台華語對照......等，系統井然有序，帶領讀者一親母親語言的芳澤。

巫義淵
現任/ 台南市台灣語文學會榮譽理事長、國立成功大學台灣文學系助理教授級兼任專家

1940年9月28日出世佇彰化縣田中，終戰後遷居高雄市，1953年參加高雄天主教西樂團奠定音樂基礎，1956年被網羅加入教會合唱團，並承蒙李庭茂老師指導學習聲樂，1960年參加高雄市立管弦樂團擔任French Horn (法國號)手。因為斯當時的教會多數攏是唱拉丁文聖歌的關係，自按呢無意中會曉閱讀白話字。家父巫修1888年出生，十外歲就受洗信奉天主教，精通白話字、四書五經、以及漢醫藥等，雖然曾擔任過幾若冬先生，但是後來退出、選擇從商。樂聲的音感佮序大人的言談，攏是造就筆者台語發音標準化的主要因素。
1945年終戰後歷經國民黨政府的經濟掠奪，一冬外物資長價七八百倍、四萬換一箍新台幣，二二八大屠殺等，家庭由富有輾轉成做平凡。筆者成長期歷盡頂面的遭遇，亦因家兄受『白色恐怖』冤獄十年之影響，無光宗耀祖的資歷，只有真濟不堪回首的人生旅程！願咱的語言文化永續常存，天佑台灣！

罕得ê先輩kap戰友
我kap巫義淵老師熟似已經chiâⁿ 10冬ah。伊m̄-nā是我台語文ê siăn-pái （先輩），mā是台文系ê同事，koh khah是街頭運動kap政治遊說ê戰友！
巫老師m̄-nā是台語文ê研究者，koh是一个行動家！咱lóng知，tī中華民國外來政權統治下，台灣人ê母語教育權ē-sái講是hông剝削kah真嚴重。Chit kúi年來，無論文場ia̍h武場，我piān若kā招，巫老師絕對無推辭。阮tiāⁿ tiāⁿ 做伙去台北iah-sī台南、高雄各地訴求爭取台灣語文應該ài有ê教育權。巫老師雖罔歲頭已經70外ah，m̄-koh piān若講tio̍h台語文kap台灣前途，伊tō中氣十足，連少年人to無伊ê āng聲。
Taⁿ，巫老師kā伊對台語俗語ê部分研究成果整理做chit本冊。Che對想beh認捌台語俗語kap書寫法ê讀者來講是一个真大ê福音。相信讀者對chit本冊ê內容ē-sái感受tio̍h巫老師對台語文ê疼心kap學問ê飽tīⁿ！

蔣為文/國立成功大學台灣文學系

闡談俗語
俗語，是世俗的智慧語言，它是人生的經驗哲學、亦是語言的藝術，利用幾個字就會當來表達世間頂所抵着的鹹、酸、甜、苦、飷、澀佮必然現象，亦就是講，用簡單的一兩句話，就會當來析剖人生的萬項事誌。親像講：抑雞不成菢 [ah-ke m̄-chiâⁿ-pū] ，真簡單五字 kā 咱講，雞若無想欲菢卵，用強抑、強迫的方式絕對菢bē成功，用這句話猶會當借鏡 [chià-kèng] 、來奉勸人對社會世事的處理方式愛細膩，凡事愛有互動的關係來做，用強迫--的定規做無好事誌。
有人講語言只是溝通的工具但定 [nā-tiāⁿ]、聽有就好，事實上根本就不是按呢，用俗語來做比喻就會當真清楚了解，一個人對語言文化若無充分的感受，干乾聽有就好，按呢敢會成做文明人？親像：物件伊做的 [mi̍h-kiāⁿ I chò--ê] ，台語是指咱咧看的物件是伊做的(已經咧看)，伊做的物件 [I chò-ê mi̍h-kiāⁿ] ，是指咱欲看伊做的物件(猶未看)等，千百句這款正反 [chiàⁿ-péng] 倒反、鋩鋩角角 [mê-mê / mî-mî kak-kak] 的台語，若無學、是欲按怎聽有就好咧？
這本冊是用俗語做主題來探討台語的媠，嘛是共款欲來了解正確的台語書寫佮讀音，會當帶來予大家了解台語的研習嘛是需要多方面來，向頭 [àⁿ-thâu] 、向望 [ǹg-bāng] 、向前 [hiòng-chiân] 直進，行出咱自己的路、行出咱台灣人的尊嚴。

第一講【抑雞不成菢】[AH-KE M-CHIÂⁿ-PŪ]
第二講【骨力食栗，貧惰吞涎】[KUT-LA̍T CHIA̍H LA̍T , PÎN-TŌAⁿ THUN-NŌA]
第三講【有功無賞，扑破著賠】[IÚ-KONG BÔ SIÚⁿ, PHAH-PHÒA TIO̍H PÔE]
第四講【想貪著趡雞籠】[SIŪⁿ-THAM TIO̍H NǸG-KE-LAM / AM]
第五講【前牛食麥、後牛還債】[CHÊNG-GÛ CHIAH-BEH , ĀU-GÛ HÊNG-CHÈ]
第六講【鷸蚌相持，魚翁得利】[UT-PĀNG SIONG-CHHÎ , GÛ-ONG TEK-LĪ]
第七講【貪--字變則貧】[THAM--JI PIÀN CHEK PÎN]
第八講【千算萬算不值天一畫】 [CHHIAN-SǸG BĀN-SǸG M-TAT THIⁿ CHIT OEH]
第九講【肉餅面包甜餡】[BAH-PIÁⁿ-BĪN PAU TIⁿ-Āⁿ]
第十講 【僫竹出好筍，好竹出痀崙】[BÁI-TEK CHHUT HÓ-SÚN , HÓ-TEK CHHUT KU-LUN]
第十一講【僫戲賢拖棚】[BÁI-HÌ GÂU-THOA-PÊⁿ / PÎⁿ]
第十二講【忍一時之氣，免百日之憂】[JÍM IT-SÎ CHI-KHÌ , BIÁN PEK-JIT CHI-IU]
第十三講【美疢不如惡砭】 [BÍ-THÌM PUT-JÛ OK-PIÁN]
第十四講人【富深山有遠親，人貧鬧街無人識】[JÎN PÙ CHHIM-SAN IÚ OÁN-CHHIN , JÎN PÎN NĀU-KE BÛ JÎN SEK]
第十五講【一犬吠影、百犬吠聲】[IT-KHIÁN HŪI ÉNG , PEK-KHIÁN HŪI SENG]
第十六講【做狗著顧家、做牛著拖犁】[CHÒ-KÁU TIO̍H-KÒ͘-KE , CHÒ-GÛ TIO̍H-THOA-LÊ]
第十七講【有錢三十為尊長，無錢八十亦虛閒】[IÚ CHIÂN SAM-SIP ÛI CHUN-TIÓNG ,BÛ CHIÂN PAT-SIP E̍K HI-HÂN]
第十八講【有麝自然香，何必當風揚】[Iú-siā chū-jiân-hiong , Hô-pit tong-hong-iông]

【試讀】
第一講【抑雞不成菢】[AH-KE M̄-CHIÂⁿ-PŪ]
這是一句用雞菢卵來做比喻的俗語，kā咱講，若用壓制的方法、強要求人來就範，叫伊做無願意做的事誌 [tāi-chì] ，做--起來一定bē順利周至，用來提醒咱，若用強硬的手段來迫人屈服，凡事定規(一定)無法度得着圓滿的成果。
【菢】 [pū]＝菢卵 [pū-nn̄g / nūi] 雞鳥禽類覆蛋的意思。
【抑雞】 [ah-ke / koe] 強制壓迫雞就範。
【不成】 [m̄-chiâⁿ] bē齊全 [chiâu-chn̂g] bē周至的意思。
雞母若生卵到一個坎站 [khám-chām]，自然家己會菢卵，這是天生自然的法則，若是生卵猶未到坎站，硬抑雞母菢卵，根本無法度達成目的，除了卵菢bē出以外、連卵嘛會被反抗的雞踏踏破。這句俗語是kā咱講，凡事愛順其自然尊重人權，用強迫的方法，人無一定會就範，有時陣若反抗倒彈 [tò-tōaⁿ] ，往往 [éng-éng] 會事得其反，假使若無反抗，嘛共款無法度得着預期的效果。
中華人民共和國佇1949年建國以來，前四十冬攏用高壓強迫的手段，叫百姓做che做he，士農工商攏無家己發揮的空間，規個社會機制原地停滯、甚至退步，造成農工業、經濟等落後數十冬，以農業為例，中國幾千冬來是以農立國，每年穀類竟然依賴進口一兩千萬噸以上，百姓三餐不繼，貧病交加哀號偏野！這是強權壓制下所產生的事實。1991年間台南有一位本身有患糖尿病的醫生，隨團去中國chhit-thô，出門的時疏忽未記得chah糖尿病的注射藥 Insulin，致使佇中國拖命旅遊幾若日，一項真普通的藥物，竟然走遍中國兩三省的人民病院尋無這款藥，無法度，這位朋友放棄旅遊提前回國。共團猶有一位朋友，伊所chah去的Camera(相機)電池無電，嘛共款走七省，尋無這款規格的電池，其實這款電池是全世界普偏咧使用的規格，因按呢，續無法度翕像來記錄旅遊行程的點滴、遺憾此行也！據講，近來托台商《錢進中國債留台灣》之福，沿海地區佮觀光景點進步真濟，總是，全中國有七八成的內陸地區，落後的情形猶相當嚴重，百姓的年收入平均不及兩百美元(指內陸)。除了頂面所講的以外，其餘用強迫壓制所產生的反作用事件猶真濟，包括社會、宗教、政治等不勝枚舉，六四天安門事件佮”法輪功”反抗事件即實例也。
三腳仔 的事例：
1955年代，高雄有一個姓蔡的少年家，出身低階層的家庭，自細漢就佇夜市仔做工度日，佇一個偶遇然的機會，熟似一個警總的特務，就按呢一方面做爪耙仔，一方面” 猴榜虎威 [kâu pn̄g-hó͘-ui] ” 靠勢來魚肉街鄰欺壓鄉親，因按呢尻脊後大家攏加號做三腳仔，對於伊的行為，夜市仔的生理人攏敢怒不敢言，表面上哪親像對伊真歡迎真配合的款式。鄉親除了月月愛付保護費以外，過年過節愛加收禮金，三不五時仔特務in kiáⁿ 欲做生日、in老父做滿月、in老母做度晬等，攏愛特別追加預算。幾若冬落來，三腳仔攏習以為常，計是(以為)大家攏對伊足好，不知影尻脊後大家攏kiāu-ka̍h無一塊好！
有一日，三腳仔佮特務做伙去屏東，扑算是去做欺壓台灣人的事誌 [tāi-chì]，倒返來的時，佇高屏大橋發生車禍，特務當場死亡、三腳仔着重傷，因按呢三腳仔續殘廢。過了後，三腳仔自按呢生活發生問題，四界向人求助，因為無特務通來倚靠，攏無人願意伸出援手，這寡原本三腳仔計是(以為)對伊真好的鄉親，一個一個攏閃離離，對這位利用惡權來欺壓人的朋友，大家攏無想欲koh佮伊交陪。三腳仔就佇貧病交加，又koh求助無門的環境下，無兩三冬就結束生命！
頂面兩個例kā咱講，人佮人的互動關係，四方互重 [sì-pang hō͘-tiōng]，以善待人、以德服人，用實質能力來信服大眾，不是用霸道來控制人權、用金錢來買權力，親像三腳仔利用惡勢力來佮鄉親建立友誼，歸尾所得着的是虛假無實的友誼，這就是”抑雞不成菢” 的警世道理。
【本文曾發表tī海翁台語文學第42期2005.06】